قُل لَّن يَنفَعَكُمُ ٱلْفِرَارُ إِن فَرَرْتُم مِّنَ ٱلْمَوْتِ أَوِ ٱلْقَتْلِ وَإِذًۭا لَّا تُمَتَّعُونَ إِلَّا قَلِيلًۭا﴿١٦﴾
33:16(നബിയേ) പറയുക: "മരണത്തില്നിന്നോ, കൊലയില്നിന്നോ നിങ്ങള് പേടിച്ചോടുന്നപക്ഷം, (ആ) ഓട്ടം നിങ്ങള്ക്കു പ്രയോജനം ചെയ്യുന്നതേയല്ല, (പ്രയോജനപ്പെട്ടു) എങ്കില്തന്നെ, അല്പ (മാത്ര) മല്ലാതെ നിങ്ങള്ക്കു (ജീവിത) സുഖം നല്കപ്പെടുകയുമില്ല."
قُلْ مَن ذَا ٱلَّذِى يَعْصِمُكُم مِّنَ ٱللَّهِ إِنْ أَرَادَ بِكُمْ سُوٓءًا أَوْ أَرَادَ بِكُمْ رَحْمَةًۭ ۚ وَلَا يَجِدُونَ لَهُم مِّن دُونِ ٱللَّهِ وَلِيًّۭا وَلَا نَصِيرًۭا﴿١٧﴾
33:17പറയുക: "വല്ല തിന്മയും അല്ലാഹു നിങ്ങളില് ഉദ്ദേശിക്കുകയോ, അല്ലെങ്കില് നിങ്ങളില് വല്ല കാരുണ്യവും ഉദ്ദേശിക്കുകയോ ചെയ്യുന്നപക്ഷം, അവനില്നിന്ന് നിങ്ങളെ തടുക്കുന്നവര് ആരാണുള്ളത്?!" അല്ലാഹുവിനുപുറമെ, ഒരു കൈകാര്യകര്ത്താവിനെയാകട്ടെ, ഒരു സഹായകനെയാകട്ടെ അവര്ക്കു കിട്ടുകയില്ല.
തഫ്സീർ : 16-17
അല്ലാഹു നിശ്ചയിച്ച കാലാവധി വിട്ടുകടന്നു മരണത്തില്നിന്നു രക്ഷപ്പെടുവാന് ആര്ക്കും സാധ്യമല്ല. ചില സന്നിഗ്ദ്ധഘട്ടങ്ങളില് പേടിച്ചോടിപ്പോയതുകൊണ്ടു തല്ക്കാലം രക്ഷപ്പെട്ടുവെന്ന് തോന്നിയേക്കാം. എന്നാല് തന്നെ ആ കാലാവധിവരെമാത്രമേ ഇവിടെ ജീവിക്കുവാനും സുഖിക്കുവാനും ആര്ക്കും സാധിക്കയുള്ളു.