നമസ്കാരത്തിലെ അഞ്ച് സന്തോഷങ്ങൾ

*📌 വിഷയം: നമസ്കാരത്തിലെ അഞ്ച് സന്തോഷങ്ങൾ* 

 

1️⃣ ഫാത്തിഹയിലെ സംഭാഷണം

 

സൂറത്തുൽ ഫാത്തിഹ പാരായണം ചെയ്യുമ്പോൾ, ഓരോ ആയത്തിനും അല്ലാഹു ﷻ മറുപടി നൽകുന്നു. ഇത് റബ്ബുമായി നേരിട്ട് സംസാരിക്കുന്നതിന്റെ അനുഭൂതി നൽകുന്നു.

 

* *അടിമ* 'الْحَمْدُ لِلَّهِ رَبِّ الْعَالَمِينَ' എന്ന് പറയുമ്പോൾ അല്ലാഹു ﷻ പറയും: "എന്റെ അടിമ എന്നെ സ്തുതിച്ചിരിക്കുന്നു (حَمِدَنِي عَبْدِي)."

* 'الرَّحْمَٰنِ الرَّحِيمِ'

 എന്ന് പറയുമ്പോൾ അവൻ പറയും: "എന്റെ അടിമ എന്നെ പുകഴ്ത്തിയിരിക്കുന്നു (أَثْنَى عَلَيَّ عَبْدِي)."

 * 'مَالِكِ يَوْمِ الدِّينِ'

 എന്ന് പറയുമ്പോൾ അവൻ പറയും: "എന്റെ അടിമ എന്നെ മഹത്വപ്പെടുത്തിയിരിക്കുന്നു (مَجَّدَنِي عَبْدِي)."

 * 'إِيَّاكَ نَعْبُدُ وَإِيَّاكَ نَسْتَعِينُ'

 എന്ന് പറയുമ്പോൾ അവൻ പറയും: "ഇത് എനിക്കും എന്റെ അടിമക്കും ഇടയിലുള്ളതാണ്, എന്റെ അടിമ ചോദിച്ചത് അവനുണ്ട് (هَذَا بَيْنِي وَبَيْنَ عَبْدِي، وَلِعَبْدِي مَا سَأَلَ)."

 * 'اهْدِنَا الصِّرَاطَ الْمُسْتَقِيمَ...'

എന്ന് അവസാനം വരെ ഓതുമ്പോൾ അവൻ പറയും: "ഇത് എന്റെ അടിമക്കുള്ളതാണ്, അവൻ ചോദിച്ചത് അവനുണ്ട് (هَذَا لِعَبْدِي وَلِعَبْدِي مَا سَأَلَ)." (സ്വഹീഹ് മുസ്‌ലിം)

 

2️⃣ 'ആമീൻ' പറയുമ്പോൾ

 

ഫാത്തിഹക്ക് ശേഷം 'ആമീൻ' പറയുമ്പോൾ രണ്ട് വലിയ സന്തോഷങ്ങളുണ്ട്:

 

* ഒന്ന്, നബി ﷺ പറഞ്ഞു: "ഇമാം 'وَلَا الضَّالِّينَ' എന്ന് പറഞ്ഞ് നിങ്ങൾ 'ആമീൻ' പറയുമ്പോൾ അല്ലാഹു ﷻ നിങ്ങൾക്ക് ഉത്തരം നൽകുന്നതാണ്." (സ്വഹീഹ് മുസ്‌ലിം)

* രണ്ട്, നമ്മുടെ 'ആമീൻ' മലക്കുകളുടെ 'ആമീനുമായി' ഒത്തുവന്നാൽ, നമ്മുടെ മുൻകഴിഞ്ഞ ചെറുപാപങ്ങൾ പൊറുക്കപ്പെടും. (ബുഖാരി, മുസ്‌ലിം)

 

3️⃣ റുകൂഇൽ നിന്ന് ഉയരുമ്പോൾ

 

ഇമാം 'سَمِعَ اللَّهُ لِمَنْ حَمِدَهُ' എന്ന് പറയുമ്പോൾ, നാം 'رَبَّنَا وَلَكَ الْحَمْدُ' എന്ന് പറയുന്നു. ഈ സമയത്തും രണ്ട് സന്തോഷങ്ങളുണ്ട്:

 

* ഒന്ന്, നബി ﷺ പറഞ്ഞു: "(അങ്ങനെ പറയുമ്പോൾ) അല്ലാഹു നിങ്ങളുടെ പ്രാർത്ഥന കേൾക്കുന്നതാണ്." (സ്വഹീഹ് മുസ്‌ലിം)

* രണ്ട്, നമ്മുടെ ഈ ഹംദ് പറയൽ മലക്കുകളുടെ ഹംദ് പറയലുമായി ഒത്തുവന്നാൽ മുൻകഴിഞ്ഞ പാപങ്ങൾ പൊറുക്കപ്പെടും. (ബുഖാരി, മുസ്‌ലിം)

 

4️⃣ റുകൂഇലും സുജൂദിലും പാപങ്ങൾ കൊഴിയുന്നു

 

നബി ﷺ സന്തോഷവാർത്ത അറിയിച്ചു: "ഒരു അടിമ നമസ്കാരത്തിൽ റുകൂഉം സുജൂദും ചെയ്യുമ്പോൾ അവന്റെ പാപങ്ങൾ അവന്റെ തലയിൽ നിന്നും ചുമലിൽ നിന്നും ഉതിർന്നു വീഴും." ഹദീസിന്റെ അവസാന ഭാഗത്ത് ഇപ്രകാരം വന്നിരിക്കുന്നു: "അവൻ റുകൂഅ് ചെയ്യുമ്പോഴും സുജൂദ് ചെയ്യുമ്പോഴുമെല്ലാം അത് അവനിൽ നിന്ന് കൊഴിഞ്ഞുകൊണ്ടേയിരിക്കും." (സ്വഹീഹുൽ ജാമിഅ്)

 

5️⃣ തശഹ്ഹുദിലെ സാർവ്വത്രികമായ സലാം

 

തശഹ്ഹുദിൽ നാം

 'السَّلَامُ عَلَيْنَا وَعَلَى عِبَادِ اللَّهِ الصَّالِحِينَ' 

(ഞങ്ങൾക്കും അല്ലാഹുവിന്റെ എല്ലാ സജ്ജനങ്ങളായ അടിമകൾക്കും സമാധാനം) എന്ന് പറയുമ്പോൾ, ആ പ്രാർത്ഥന ആകാശങ്ങളിലും ഭൂമിയിലുമുള്ള സ്വാലിഹുകളായ എല്ലാ അടിമകൾക്കും (മനുഷ്യർ, ജിന്നുകൾ, മലക്കുകൾ) ലഭിക്കുന്നു. നബി ﷺ പറഞ്ഞു: "നിങ്ങൾ അപ്രകാരം പറഞ്ഞാൽ, ആകാശത്തും ഭൂമിയിലുമുള്ള അല്ലാഹുവിന്റെ എല്ലാ സജ്ജനങ്ങളായ അടിമകൾക്കും അത് (ആ സലാം) ചെന്നെത്തുന്നതാണ്." (സ്വഹീഹ് ബുഖാരി, മുസ്‌ലിം)

ഈ സന്തോഷങ്ങളെല്ലാം അല്ലാഹു നൽകുന്ന വലിയ സമ്മാനങ്ങളാണ്. ഇവയെല്ലാം അറിഞ്ഞും ആഗ്രഹിച്ചും നമസ്കരിക്കുമ്പോൾ, നമ്മുടെ ഓരോ നമസ്കാരവും നമുക്ക് കൺകുളിർമ നൽകുന്നതായി മാറും. അല്ലാഹു ﷻ നമ്മുടെ നമസ്കാരങ്ങളെ അപ്രകാരം കൺകുളിർമയുള്ളതാക്കിത്തീർക്കുമാറാകട്ടെ